Հերոս Քյարամ Սլոյանը
Ապրիլյան պատերազմի հերոս Քյարամ Սլոյանը ծնվել է 1996 թ. ապրիլի 27-ին ՀՀ Արագածոտնի մարզի Արտաշավան գյուղում: Քյարամը «քառօրյա պատերազմ»-ի առաջին զոհերից էր:
Կապիտան Արմենակ Ուրֆանյանի հրամանատարությամբ ծառայող Քյարամ Սլոյանը իր զինակիցների հետ միասին կարողացել է երկու անգամ ետ մղել հակառակորդի գրոհը։
Ադրբեջանական հատուկ ջոկատայինների գերազանցող ուժերի ճնշման տակ կապիտան Արմենակ Ուրֆանյանը անձնակազմին հրամայել է հեռանալ առաջնագծից, սակայն շարքայիններ Քյարամ Սլոյանը և Ռոբերտ Աբաջյանը չենթարկվելով հրամանատարի հրամանին, շարունակել են պաշտապանական մարտը։
Քյարամի հայրը՝ Քյալաշ Սլոյանը Արցախյան առաջին պատերազմի մասնակիցներից է:
Քյարամի զոհվելուց հետո թշնամին նրան գլխատել է:
Քյարամի մասին կարդացեք նաև այստեղ.
Մարտակերտում զոհված Քյարամ Սլոանին վերահուղարկավորել են
Ճակատագրով կապվածները… Քյարամ Սլոյան և Արմենակ Ուրֆանյան
__________________________________________________________________________________________
Քյարամ Սլոյանի ընտանիքն ապրում է Արագածոտնի մարզի Արտաշավան գյուղում։ Քյարամ Սլոյանն այն անձնազոհ զինվորն էր, ով մինչև վերջին վայրկյանը մնացել էր իր հրամանատարի` Արմենակ Ուրֆանյանի կողքին ու նրա հետ էլ` զոհվել: Քյարամի զոհվելուց հետո թշնամին գլխատել էր հերոսին: Հաշվի առնելով Քյարամի մահվան սարսափելի պատմությունը՝ որոշեցինք ընտանիքին որևէ հարց չտալ տղայի մասին` մեկ անգամ ևս չբորբոքելու որդեկորույս ընտանիքի խորը վերքը: Ցավալի է, բայց հերոսի ընտանիքն ապրում էր շատ վատ կենցաղային ու սոցիալական պայմաններում: Նրանց տանը, Քյարամի նկարի կողքին դրված էր նաև Արմենակ Ուրֆանյանի նկարը:
Շնորհակալություն հետևյալ հայրենասեր նվիրատուներին մեր հերոսի ընտանիքին աջակցելու համար․ Հակոբ Սեկսենյան, Գոհար Ղազանչյան։