Հերոս Սարգիս Սահակյանը
Ապրիլյան պատերազմի հերոս, ժամկետային զինծառայող, 1995 թ. ծնված Սարգիս Սահակյանը Կոտայքի մարզի Հրազդան քաղաքից էր:
«Հայրենասեր»-ն այցելեց զոհված հերոս ՍԱՐԳԻՍ ՍԱՀԱԿՅԱՆԻ ընտանիքին Հրազդանում և փոխանցեց մեր աջակիցների երախտագիտությունն ու $500։
Սարգիսի մայրը՝ Թամարան, քեռու տանն է ապրում ու շատ վատառողջ է, նոր է վիրահատվել: 4 տարեկան հասակում մայրը Սարգիսին տանում է Ռուսաստան: 12 տարի Հայաստան չեն գալիս մինչև Սարգիսի զորակոչը: Վերադառնում են Հայաստան, ու 3 ամիս անց Սարգիսը գնում է բանակ: Ասել է. «Մամ, բա չգնամ բանակ, ո՞նց կլինի: Տղաներով, որ բանակից խոսենք, ես էլ մի բան պատմեմ»: Սարգիսը մի քանի անկատար երազանք ուներ․ հանդիպել ֆուտբոլիստ Հենրիխ Մխիթարյանին, մոր համար տուն գնել ու Հայաստանի տեսարժան վայրերը գնալ, հատկապես Սևան: Բանակում նրան բոլորը «Ռուսկի» են կոչել, քանի որ հայերեն չի խոսել: Մայրն ասում է, որ միշտ զանգել է ու ասել, որ մայրիկի համար «սյուրպրիզ» ունի: «Հենա, սյուրպրիզ արեց»: Ցույց էր տալիս մայրը նկարն ու լաց լինում: