Հերոս Վլադիմիր Ալիխանյանը
Արցախյան պատերազմի հերոս Վլադիմիր Ալիխանյանը Դիլիջան քաղաքից էր, ծնվել է 1996 թ.:
Ժամկետային զինծառայող Ալիխանյանն ապրիլի սկզբին զոհվել է Արցախի պաշտպանական մարտերում: Տանկիստ Վլադիմիր Ալիխանյանը հերոսական պայքարի մեջ է մտել, հակառակորդին մեծ վնասներ հասցրել եւ մինչեւ խոցվելը գրեթե սպառել տանկի զինանոցում եղած արկերը:
Վլադիմիրի մասին կարդացեք նաեւ այստեղ.
Ապրիլյան պատերազմի հերոսներ. Վլադիմիր Ալիխանյան
Տանկիստ Ալիխանյանը պայքարել է մինչեւ վերջ՝ մեծ կորուստներ հասցնելով թշնամուն
______________________________________________________________________________
«Հայրենասեր»-ն այցելեց զոհված հերոս ՎԼԱԴԻՄԻՐ ԱԼԻԽԱՆՅԱՆԻ ընտանիքին Տավուշի մարզի Դիլիջան քաղաքում և փոխանցեց մեր աջակիցների երախտագիտությունն ու $500։
Վլադիմիրի ընտանիքն ապրում է Տավուշի մարզի Դիլիջան քաղաքում։ Մեր այցելության ժամանակ զրուցեցինք Վլադիմիրի ծնողների հետ։ Մայրը թախծոտ աչքերով պատմում էր որդու մասին։ Մեկ ամսից Վլադիմիրը պետք է զորացրվեր։ Երբեք Վլադիմիրը ծառայությունից չի բողոքել: Քանի որ շատ է սիրել անասնապահությունը (դրանով զբաղվել է մինչև բանակ գնալը) մայրիկին խոստացել էր փոքրիկ ֆերմա կառուցել ու ընտանիքի հոգսը թեթևացնել բանակից վերադառնալուն պես: Վլադիմիրի մայրն ասաց, որ հեռուստացույց չի նայում, բայց երբեմն խոհանոցից լսում է հերթական զոհի մասին ու սիրտը կտոր-կտոր է լինում: «Ճիշտ է, Վլադիմիրն էլ չկա, բայց միևնույն է, ամեն զինվորի համար հուզվում եմ, արտասվում», ասում է մայրը։ Զավակներից միայն փոքր եղբայրը մնաց այս ընտանիքում, ով դպրոցը կավարտի այս տարի։